பறவை மோதியதால் தொழில்நுட்ப கோளாறு கஜகஸ்தானில் அவசரமாக தரை இறங்கும்போது விமானம் வெடித்துச் சிதறி 42 பேர் பலி25 பேர் அதிர்ஷ்டவசமாக உயிர் தப்பினர்
அஸ்தானா, டிச.26-
பறவை மோதியதால் தொழில்நுட்ப கோளாறு கஜகஸ்தானில் அவசரமாக தரை இறங்கும்போது விமானம் வெடித்துச் சிதறி 42 பேர் பலி25 பேர் அதிர்ஷ்டவசமாக உயிர் தப்பினர்
விமானத்தில் மோதிய பறவை
ஐரோப்பிய நாடான அஜர்பைஜானின் தலைநகர் பாகுவில் இருந்து, ரஷியாவின் குரோஸ்னி நகருக்கு அஜர்பைஜான் ஏர்லைன்ஸ் விமான நிறுவனத்துக்கு சொந்தமான பயணிகள் விமானம் நேற்று புறப்பட்டு சென்றது. ‘எம்ப்ரேயர் 190’ ரக விமானத்தில் 2 விமானிகள் உள்பட 5 பணியாளர்களும், 62 பயணிகளும் இருந்தனர்.
இந்த விமானம் கஜகஸ்தான் நாட்டின் வான்பரப்பில் பறந்து கொண்டிருந்தபோது விமானம் மீது பறவை ஒன்று மோதியதாக கூறப்படுகிறது. இதனால் விமானத்தை அவசரமாக தரையிறக்க வேண்டிய கட்டாயம் ஏற்பட்டது.
எனவே கஜகஸ்தானின் அக்தாவ் நகருக்கு திருப்பி அங்குள்ள விமான நிலையத்தில் விமானத்தை அவசரமாக தரையிறக்க விமானிகள் முடிவு செய்தனர். அதன்படி அக்தாவ் நகர விமான நிலைய அதிகாரிகளுக்கு இது குறித்து தகவல் தெரிவித்து, விமானத்தை அவசரமாக தரையிறக்குவதற்கான அனுமதியை பெற்றனர்.
வெடித்துச் சிதறியது
இதையடுத்து விமானம் திசை மாற்றப்பட்டு அக்தாவ் நகர விமான நிலையத்தை நோக்கி பறக்க தொடங்கியது. ஆனால் விமான நிலையத்தை அடைவதற்கு முன்பாக விமானம் விமானிகளின் கட்டுப்பாட்டை இழந்தது. இதையடுத்து விமானத்தை பத்திரமாக தரையிறக்க விமானிகள் கடுமையாக போராடினர்.
இதனால் விமானம் சிறிது நேரத்துக்கு வானில் வட்டமிட்டபடி இருந்தது. பின்னர் அக்தாவ் நகர விமான நிலையத்தில் இருந்து 3 கி.மீ தொலைவுக்கு முன்னதாக உள்ள திறந்தவெளி பகுதியில் விமானத்தை அவசரமாக தரையிறங்கும் முயற்சியை விமானிகள் கையில் எடுத்தனர்.
சரியாக தரையிறங்குவது போலவே விமானம் தரை நோக்கி சென்று கொண்டிருந்தது. ஆனால் அடுத்த சில நொடிகளில் விமானம் திடீரென தரையில் விழுந்து வெடித்துச் சிதறி தீப்பிடித்தது. பெரும் தீப்பிழம்புகளுடன் கரும்புகை மண்டலம் உருவானது.
42 பேர் பலி
இந்த விபத்து குறித்த தகவல் கிடைத்ததும் போலீசார், தீயணைப்பு வீரர்கள் மற்றும் மீட்பு குழுவினர் சம்பவ இடத்துக்கு விரைந்து சென்று, தீவிர மீட்பு பணியில் ஈடுபட்டனர்.
எனினும் இந்த கோர விபத்தில் 2 விமானிகள் உள்பட 42 பேர் சம்பவ இடத்திலேயே பரிதாபமாக உயிரிழந்தனர். அதே சமயம் 25 பேர் அதிர்ஷ்டவசமாக உயிர் தப்பினர்.
ரஷிய அதிபர் இரங்கல்
படுகாயங்களுடன் அவர்களை காப்பாற்றிய மீட்பு குழுவினர் ஆம்புலன்சுகள் மூலம் அருகில் உள்ள ஆஸ்பத்திரிகளுக்கு அனுப்பி வைத்தனர். அங்கு அவர்களுக்கு தீவிர சிகிச்சை அளிக்கப்பட்டு வருகிறது.
இந்த நிலையில் காமன்வெல்த் தலைவர்களின் கூட்டத்துக்காக ரஷியாவுக்கு சென்று கொண்டிருந்த அஜர்பைஜான் நாட்டின் அதிபர் இல்ஹாம் அலியேவ், விபத்து பற்றிய செய்தியைக் கேள்விப்பட்டு உடனடியாக அஜர்பைஜானுக்கு திரும்பினார்.
விபத்து தொடர்பாக அவர் சமூக வலைத்தளத்தில் வெளியிட்ட பதிவில், “விமான விபத்தில் பலியானவர்களின் குடும்பங்களுக்கு எனது இரங்கலைத் தெரிவித்துக் கொள்கிறேன். காயமடைந்தவர்கள் விரைவில் குணமடைய பிரார்த்திக்கிறேன்” என தெரிவித்தார்.
ரஷிய அதிபர் புதின், இல்ஹாம் அலியேவை தொலைபேசியில் தொடர்பு கொண்டு விபத்து தொடர்பாக இரங்கல் தெரிவித்தார்.
பல்வேறு கோணங்களில் விசாரணை
பறவை மோதியதால் விமானம் திருப்பிவிடப்பட்டதாக கூறப்படும் நிலையில், குரோஸ்னி நகரில் நிலவிய மோசமான வானிலை காரணமாகவே அக்தாவ் நகருக்கு திருப்பிவிடப்பட்டதாக மற்றொரு தரப்பு தகவல்கள் தெரிவிக்கின்றன.
இந்த விபத்து குறித்து உயர்மட்ட விசாரணைக்கு உத்தரவிட்டுள்ள அஜர்பைஜான் அரசு, விபத்து நடந்த இடத்தில் விசாரணை நடத்த அஜர்பைஜானின் அவசரகால சூழ்நிலைகள் மந்திரி, நாட்டின் துணை பொது வக்கீல் மற்றும் அஜர்பைஜான் ஏர்லைன்ஸ் துணைத் தலைவர் ஆகியோரை கொண்ட ஒரு குழுவை அக்தாவ் நகருக்கு அனுப்பியது.
விபத்து தொடர்பாக அஜர்பைஜான் ஏர்லைன்ஸ் விமான நிறுவனம் வெளியிட்ட அறிக்கையில் “விமானத்தில் பயணித்தவர்களில் 37 பேர் அஜர்பைஜானைச் சேர்ந்தவர்கள், 16 பேர் ரஷியாவை சேர்ந்தவர்கள், 6 பேர் கஜகஸ்தானை சேர்ந்தவர்கள், 3 பேர் கிர்கிஸ்தானைச் சேர்ந்தவர்கள். இந்த விபத்து குறித்து கஜகஸ்தான் மற்றும் அஜர்பைஜான் அதிகாரிகள் தீவிரமாக விசாரணை நடத்தி வருகின்றனர். பல்வேறு கோணங்களில் இந்த விசாரணை நடத்தப்பட்டு வருகிறது” என தெரிவிக்கப்பட்டுள்ளது.
வீடியோ, புகைப்படங்கள் வைரல்
இதனிடையே விமானம் தரையில் விழுந்து தீப்பிடித்து எரிந்தபோது எடுக்கப்பட்ட வீடியோ காட்சிகள் சமூக வலைத்தளங்களில் வைரலாகி வருகின்றன.
அதேபோல விமானம் உடைந்து 2-3 பாகங்களாக உடைந்து நொறுங்கி கிடப்பதை காட்டும் புகைப்படங்களும் அதிகளவில் பகிரப்பட்டு வருகின்றன.
