ரெயில் பயணிகளே கவனிங்க! ஆன்லைன் டிக்கெட் முன்பதிவில் ஐஆர்சிடிசி கொண்டு வந்த அதிரடி மாற்றம் – இனி இது கட்டாயம்!
ரெயில் டிக்கெட் முன்பதிவில் நடக்கும் மோசடிகளைத் தடுக்கவும், பயணிகளின் பாதுகாப்பை உறுதி செய்யவும் ஐஆர்சிடிசி (IRCTC) இணையதளத்தில் புதிய விதிகளை ரெயில்வே நிர்வாகம் அமல்படுத்தியுள்ளது.
ஆதார் எண் கட்டாயம்:
ஐஆர்சிடிசி இணையதளத்தில் காலை 8 மணி முதல் மாலை 4 மணி வரை ரெயில் டிக்கெட் முன்பதிவு செய்ய இனி ஆதார் எண் (Aadhaar Number) இணைக்கப்பட்டிருப்பது கட்டாயமாக்கப்பட்டுள்ளது.
முக்கிய தகவல்கள்:
- தட்கல் முன்பதிவு:ஆதார் எண் இணைக்கப்படாவிட்டால் தட்கல் டிக்கெட்டுகளை முன்பதிவு செய்ய முடியாது என ஏற்கனவே அறிவிக்கப்பட்டுள்ளது.
- முன்பதிவு தொடங்கும் நாள்: ரெயிலுக்கான டிக்கெட் முன்பதிவு தொடங்கும் முதல் நாளிலேயே (Opening day booking) டிக்கெட் எடுக்கவும் இனி ஆதார் அவசியம் எனத் தெரிவிக்கப்பட்டுள்ளது.
- கடைசி தேதி: வரும் ஜனவரி 12-ஆம் தேதிக்கு பிறகு, ஆதார் எண் இணைக்கப்பட்டிருந்தால் மட்டுமே ஆன்லைன் மூலம் டிக்கெட் முன்பதிவு செய்ய முடியும் என்பது குறிப்பிடத்தக்கது.
டிக்கெட் கவுண்டர்கள் நிலை என்ன?
இந்த புதிய மாற்றம் ஐஆர்சிடிசி ஆன்லைன் இணையதள முன்பதிவுக்கு மட்டுமே பொருந்தும். ரெயில் நிலையங்களில் உள்ள டிக்கெட் கவுண்டர்களில் (Counters) டிக்கெட் எடுக்கும் முறையில் எந்த மாற்றமும் செய்யப்படவில்லை.
ஆன்லைன் மூலம் டிக்கெட் முன்பதிவு செய்பவர்கள் எவ்வித சிரமமும் இன்றி பயணம் செய்ய, உடனடியாக தங்களது ஐஆர்சிடிசி கணக்கில் ஆதார் எண்ணை இணைத்துக்கொள்ளுமாறு ரெயில்வே அறிவுறுத்தியுள்ளது.
