புதுக்கோட்டை மாவட்டத்தில் 187 குளங்கள் முழுமையாக நிரம்பின

புதுக்கோட்டை, டிச.18-

புதுக்கோட்டை மாவட்டத்தில் 187 குளங்கள் முழுமையாக நிரம்பின.

பருவ மழை

புதுக்கோட்டை மாவட்டத்தில் வடகிழக்கு பருவ மழை பரவலாக பெய்து வருகிறது. கடந்த அக்டோபர், நவம்பர் மாதங்களில் சராசரியான அளவு மழை பெய்தது. பெரிய அளவில் மழை பெய்யவில்லை. இதனால் மாவட்டத்தில் நீர்நிலைகளில் நீர்மட்டம் குறைவாக இருந்தது. ஒரு சில குளங்கள் மட்டுமே நிரம்பியிருந்தன.

இந்த நிலையில் இம்மாதத்தில் மழை சற்று அதிகமாக பெய்துள்ளது. இதில் கடந்த வாரத்தில் வங்கக்கடலில் உருவான காற்றழுத்த தாழ்வு நிலையால் மழை பரவலாக பெய்தது. இதிலும் கடற்கரை பகுதியான மணமேல்குடி, ஆவுடையார்கோவில் ஆகிய இடங்களில் பலத்த மழை பெய்தது. இதனால் அங்குள்ள நீர்நிலைகள் பல நிரம்பி உபரி நீர் வெளியேறின.

முழு கொள்ளளவு

இந்த நிலையில் மாவட்டத்தில் மற்ற இடங்களில் அதிகமாக மழை இல்லாததால் குளங்கள், கண்மாய்கள் நிரம்பவில்லை. பல இடங்களில் 20 சதவீதத்திற்கும் குறைவாக காணப்படுகின்றன. திருமயம், பொன்னமராவதி, குளத்தூர், இலுப்பூர், விராலிமலை, கந்தர்வகோட்டை தாலுகா பகுதிகளில் அதிக மழை இல்லை.

அதனால் அப்பகுதிகளில் குளங்களில் நீர்மட்டம் குறைவாக உள்ளது. மாவட்டத்தில் பொதுப்பணித்துறையின் கட்டுப்பாட்டில் 961 குளங்கள் உள்ளன. இதில் 187 குளங்கள் முழுமையாக நிரம்பின. இதில் 100 சதவீதம் முழு கொள்ளளவை நீர்மட்டம் எட்டியுள்ளதோடு, உபரி நீர் வெளியேறி செல்கிறது.

25 சதவீதத்திற்கும் குறைவாக…

இதேபோல 159 குளங்களில் நீர்மட்டம் 75 சதவீதத்திற்கு மேலும், 142 குளங்கள் 50 முதல் 75 சதவீதம் வரையும் நிரம்பியுள்ளன. 231 குளங்கள் 25 முதல் 50 சதவீதம் வரையும், 242 குளங்கள் 25 சதவீதத்திற்கு குறைவாகவும் நீர்மட்டம் காணப்படுகிறது.

பருவ மழை இன்னும் நீடிக்கும் என்பதால் நீர்மட்டம் உயரும் என எதிர்பார்க்கப்படுகிறது.