புதுக்கோட்டை அருகே முக்கண்ணாமலைப்பட்டியில் மழை வேண்டி சிறப்பு தொழுகை.

அன்னவாசல், ஏப்.29-

புதுக்கோட்டை மாவட்டத்தில் பருவ மழை பெய்யாததால் கடும் வறட்சி நிலவி வருகிறது. மேலும், நிலத்தடி நீர்மட்டம் தொடர்ந்து குறைந்து வருகிறது. இதனால் மாவட்டத்தின் பல்வேறு இடங்களில் குடிநீர் வேண்டி பொதுமக்கள் சாலை மறியலில் ஈடுபட்டு வருகிறார்கள்.

இந்தநிலையில், முக்கண்ணாமலைப்பட்டியில் மழை வேண்டி சிறப்பு தொழுகை நடைபெற்றது. இதையொட்டி செங்குளம் பஸ் நிலையத்தில் இருந்து கனரா வங்கி, மதினா பள்ளிவாசல், வடக்குதெரு வழியாக முகைதீன் ஆண்டவர்மலை வரை தக்பீர் முழக்கத்துடன் முஸ்லிம்கள் ஊர்வலமாக சென்று பெரிய பள்ளிவாசல் ஈத்கா மைதானத்தில் சிறப்பு தொழுகையில் ஈடுபட்டனர்.

இதேபோல் தமிழ்நாடு தவ்ஹீத் ஜமாத் சார்பில் முக்கண்ணாமலைப்பட்டி என்.எம்.ஆர். திடல், அன்னவாசல் பள்ளிவாசல் திடல் பகுதிகளில் மழை வேண்டி சிறப்பு தொழுகை நடைபெற்றது.