புத்தக திருவிழாவை முன்னிட்டு விழிப்புணர்வு: ஒரே நாளில் 1 லட்சம் பேர் புத்தகம் வாசிப்பு, மாணவர்களுடன் கலெக்டர் பங்கேற்பு.
புதுக்கோட்டை, ஜூலை.10-
புதுக்கோட்டையில் புத்தக திருவிழாவை முன்னிட்டு விழிப்புணர்வு ஏற்படுத்தும் வகையில் ஒரே நாளில் 1 லட்சம் பேர் புத்தகம் வாசித்தனர். மாணவர்களுடன் கலெக்டர் மெர்சி ரம்யா பங்கேற்றார்.
புத்தக திருவிழா
புதுக்கோட்டை மாவட்ட நிர்வாகம் மற்றும் அறிவியல் இயக்கம் சார்பில் 7-வது புத்தக திருவிழா புதுக்கோட்டை மன்னர் கல்லூரியில் வருகிற 27-ந் தேதி முதல் தொடங்கி அடுத்த மாதம் (ஆகஸ்டு) 5-ந் தேதி வரை நடைபெற உள்ளது. இதைமுன்னிட்டு பொதுமக்களிடம் விழிப்புணர்வு ஏற்படுத்தும் வகையில் புதுக்கோட்டை வாசிக்கிறது எனும் நிகழ்ச்சி மாவட்டம் முழுவதும் பல்வேறு இடங்களில் நடைபெற்றது.
புதுக்கோட்டையில் மன்னர் கல்லூரியில் நடைபெற்ற நிகழ்ச்சியில் கலெக்டர் மெர்சி ரம்யா பங்கேற்றார். அவர் மாணவ-மாணவிகளுடன் தரையில் அமர்ந்து புத்தகம் வாசிக்கும் நிகழ்ச்சியை தொடங்கி வைத்தார். மாணவ-மாணவிகளும், நிகழ்ச்சியில் பங்கேற்றவர்களும் புத்தகங்களை வாசித்தனர்.
1 லட்சம் பேர் வாசிப்பு
இதேபோல புதுக்கோட்டை மாவட்டம் முழுவதும் பள்ளி, கல்லூரிகளிலும் மாணவ, மாணவிகள், வழக்கறிஞர்கள், வணிகர்கள், விவசாயிகள், வியாபாரிகள் உள்ளிட்ட 1 லட்சத்திற்கும் மேற்பட்டோர்கள் புத்தகங்களை வாசித்தனர். இதன்மூலம் அனைவரும் புத்தகங்களை நாள்தோறும் வாசிப்பதன் வாயிலாக தங்களது அறிவாற்றல் மென்மேலும் பெருக்கமடையும்.
மேலும் தங்களுக்கான வாசிப்பு திறனும் அதிகரிக்கும் எனவும், எனவே மாணவர்கள், பொதுமக்கள் உள்ளிட்ட அனைவரும் நாள்தோறும் அறிவு சார்ந்த புத்தகங்களை வாசிப்பதன் மூலம் தங்களது வாழ்க்கை நல்வழிக்கு பேருதவியாக அமையும் என கலெக்டர் மெர்சி ரம்யா தெரிவித்தார்.
கலந்துரையாடல்
அதன்பின்னர் புத்தக திருவிழா நடைபெறும் இடத்தை பார்வையிட்டார். அதனைத்தொடர்ந்து, கல்லூரியில், முதலாமாண்டு சேர்ந்துள்ள மாணவர்களுடன் கலந்துரையாடினார்.
இந்நிகழ்வுகளில், மாவட்ட வருவாய் அலுவலர் (பொறுப்பு) ரம்யாதேவி, புதுக்கோட்டை வருவாய் கோட்டாட்சியர் ஐஸ்வர்யா, மாவட்ட முதன்மைக்கல்வி அலுவலர் (பொறுப்பு) சண்முகம், கல்லூரி முதல்வர் புவனேஸ்வரி, ஒருங்கிணைப்பாளர்கள் தங்கம் மூர்த்தி, மணவாளன், ராஜ்குமார், வீரமுத்து, முத்துக்குமார் உள்ளிட்டோர் கலந்து கொண்டனர்.
விராலிமலை, மணமேல்குடி
விராலிமலை அரசு பெண்கள் மேல்நிலைப்பள்ளியில் புதுக்கோட்டை வாசிக்கிறது நிகழ்ச்சி நடைபெற்றது. இதில் மாணவிகள், ஆசிரியர்கள் அனைவரும் பள்ளி வளாகத்தில் அமர்ந்து அறம் சார்ந்த இலக்கியங்கள், தேசிய தலைவர்களின் வாழ்க்கை வரலாறு உள்ளிட்ட நூல்களை ஆர்வமுடன் வாசித்து மகிழ்ந்தனர்.
மணமேல்குடி அருகே வெள்ளூர் ஊராட்சி ஒன்றிய நடுநிலைப்பள்ளியில் தலைமை ஆசிரியர் (பொறுப்பு) சீனிவாசன் தலைமையில் புத்தகம் வாசிப்பு நிகழ்ச்சி நடைபெற்றது. இதில் அனைத்து மாணவர்கள், ஆசிரியர்கள் கலந்து கொண்டு புத்தகங்களை வாசித்தனர்.
கறம்பக்குடி, ஆலங்குடி
கறம்பக்குடி தாலுகாவில் உள்ள அனைத்து அரசு மற்றும் தனியார் பள்ளிகளில் மாணவர்கள் புத்தகங்களை வாசித்தனர். கறம்பக்குடி அரசு கலை அறிவியல் கல்லூரியில் நடைபெற்ற நிகழ்ச்சியில் கந்தர்வகோட்டை சட்டமன்ற உறுப்பினர் சின்னதுரை, கறம்பக்குடி தாசில்தார் ஜபருல்லா ஆகியோர் கலந்து கொண்டு மாணவர்களுடன் புத்தகங்கள் வாசித்தனர்.கறம்பக்குடி அருகே உள்ள தட்டாமனைப்பட்டி அரசு நடுநிலைப்பள்ளி மாணவர்கள் சூரியகாந்தி மலர் வடிவில் அமர்ந்து புத்தகங்களை வாசித்தனர்.
ஆலங்குடி முழு நேர கிளை நூலகத்தில் புத்தகம் வாசிப்பு நிகழ்ச்சி வாசகர் வட்ட தலைவர் பாபுஜான் தலைமையில், ஆலங்குடி பேரூராட்சி மன்ற தலைவர் ராசி.முருகானந்தம், வாசகர் வட்ட உறுப்பினர்கள், மாணவர்கள் கலந்து கொண்டு புத்தகங்களை வாசித்தனர். இதையடுத்து அமைச்சர் மெய்யநாதன் சார்பில் ரூ.5 ஆயிரம் மதிப்புள்ள புத்தகங்களை பேரூராட்சி மன்ற தலைவர் நூலகரிடம் வழங்கினார்.
